التخطي إلى المحتوى
شرح الفكرة العامة لـ CDP Data وعلاقتها بتحسين النتائج على محركات البحث

موضوع اليوم هو شرح الفكرة العامة لـ CDP Data وعلاقتها بتحسين النتائج على محركات البحث وكمان اشهر الاستخدامات بتاعت CDP… وده بناءً على طلب بعض الاخوة جزاهم الله خيرًا….. تعال كده نعرف فكرة عامة… عن اهم الاستخدامات لـ CDP فى نقاط عامة كده .

مادا تعني Customer Data Platform

بداية كده CDP اختصار لجملة “Customer Data Platform” يعنى منصة بيانات العملاء… والحقيقة المنصات البرمجية اللى من النوع ده عندها القدرة انها تدمج بيانات كتيير زى بيانات Google Analytics وكمان بيانات Google Search Console وتعطيك نظرة متعمقة عن الوضع الحقيقي لرحلة المستخدم من محرك البحث لحد ما يخرج من الموقع وكل الـ Events اللى قام بيها….

والحقيقة منصات CDP بتوفرلك حزم برمجية جاهزة للاستخدام ومن نوع SDK وهو ما يعرف بـ Software Development Kit… طيب ايه النوع ده عشان تبقى فاهم… عبارة عن مجموعة حزم برمجية جاهزة للاستخدام والتكامل مع أدوات تانيه… عندك مثلاً Google Analytics SDK وعندك كمان AWS SDK وكمان Firebase SDK….

يعنى مثلاً نستخدم حزمة Google Analytics SDK عشان نتتبع اداء الموقع على منصة CDP بسهولة وكمان نتتبع كل الاحداث اللى بيقوم بيها المستخدم ونستخدم ده كله فى تحسين تجربة المستخدم بالاضافة لمعرفة الصفحات الضعيفة وكمان نعرف الـ Events السلبية عشان نتجنبها….

مش بس كده كمان نقدر من خلالها نعرف ايه أهم الانشطة اللى ممكن المستخدمين يعملوها على المتاجر الإلكترونية… زى مثلاً نعرف الصفحات اللى ديمًا المستخدم يخرج منها ويرجع للسيرب على طول بدل ما يرجع مثلاً لصفحة تانية داخل الموقع….ومن هنا نقدر نحسن الصفحات دى عشان نزود التفاعل عليها اكتر وبالتالى لو هى واخده ترتيب 10 نخليها مثلاً 5 وهكذا….

وكمان من خلال CDP بنقدر نعمل شوية انابيب بيانات مخصصة كده على Google Cloud لمجموعة معينة من المستخدمين المشتركين مثلاً فى المكان وكمان الاهتمامات الديمغرافية وكمان عمليات البحث القديمة على جوجل….. وده طبعًا بنستخدم فيه شوية ادوات من Library جوجل عشان نقدر نتحكم كويس وللاسف كلها مدفوعة…

طيب يعنى ايه أنابيب بيانات مخصصة…. يعنى مثلاً نعمل قاعدة بيانات لمجموعة مستخدمين مشتركين فى بعض الخصائص “المكان – طلبات البحث اللى ظهرنا فيها للمستخدمين دول – كل الـ Events المشتركين فيها – كمان الداتا الديمغرافية” طيب ايه لازمة الكلام ده…؟ ببساطة عشان نقدر نتوقع النوايا المستقبلية ليهم على الـ SERPs ونشتغل عليها بدرى بدرى قبل المنافس.

وكمان من خلال المنصات دى بنعرف بعد دمج البيانات تأثير كل Events بيقوم بيه الزائر على السيرفرات من خلال مؤشرات معينة… عشان نعرف هل مطلوب نرقى ولا نثبت ولا ننزل شوية.. كده يعنى

شرح “Customer Data Platform”

وكمان لازم تفهم ان المنصات دى بتعمل قنوات بيانات موحدة، بمعنى ايه…؟ بمعنى ان حضرتك بتجمع كل البيانات اللى عندك زى Google Search Console وكمان Google Analytics وكمان لو شغال متاجر الكترونية بنسحب الداتا وكل ده نضربه فى الخلاط من خلال اى منصة CDP ونطلع مؤشرات أداء عامة ونعرف نقاط الضعف والقوة عندنا فى ايه بالظبط….

وكمان أهمية منصات CDP كلها بتتشكل فى قدرتها على تحليل سلوك الزائر من لحظة التفكير ع السيرب فى دخول الويب سايت لحد لحظة الخروج من الموقع… هديك مثال بسيط…. عندك منصة Netflix مثلاً كانت متعاقدة مع الشركة عندنا قبل كده.. عشان ندير البيانات عندها ونحسن الظهور شوية فى بعض الولايات في امريكا…. ونعرف نطلع فى بعض الكلمات…. اللى الفريق عمله كالاتى :

جمعنا البيانات من Search Console مع Google Analytics وشوية داتا من خلال قنوات مخصصة على Google Cloud وبعدين دمجناها من خلال منصة CDP شهيرة وهى BlueConic….. ايه اللى حصل بقى… عملنا شوية مؤشرات عامة كده وبعدين عملنا Test Room مغلقة لمدة شهر كامل على المستخدمين فى ولاية فرجينيا عشان للاسف كان الظهور على Google ضعيف فى الولاية دى بالرغم انها فيها حوالى 8 مليون مقيم….

المهم اكتشفنا ان معظم الكلمات اللى واخده رانك على SERPs المستخدم بيدخل من عليها وبعدين يغير المسار خلال 30Ms كمتوسط… ومن هنا بدأنا نحسن على الصفحات التانية اللى الزائر بيروحلها دى اكتر عشان نعزز تواجدها فى الولاية دى على محركات البحث… لاننا ببساطه اكتشفنا اهتمام الناس فى الولاية ايه ووفرناه… بس كده ده مثال من آلاف الأمثلة…. وللامانه المشروع ده مضربتش فيه مفك لأسباب شخصية…

وعايز افهمك كمان ان منصات CDP ليها استخدامات كتير مع MarTech Stack بس للامانه اللى يخصنا احنا فى النقطة دى كـ SEO Manager هو فقط تحسين تجربة المستخدم على الموقع… زى مثلاً فى وول مارت كنا بنستخدم MarTech Stack عشان بس نعرف اهتمامات المستخدمين بناء على شوية معايير زى المكان والديمغرافيا وكده يعنى.. ومن هنا نقدر نعرض للناس دى منتجات تهمهم ونحسن مدة تواجدهم بالموقع و نقلل شوية من الـ Bounce rate….

طيب ايه هيا MarTech Stack عشان تبقى فاهم… هى عبارة عن مجموعة كده صغيرة من الأدوات السمارت بنستخدمها عشان نحسن تجربة المستخدم بالنسبة لينا احنا كـ SEO Manager وفى نفس الوقت فريق التسويق في الشركة يظبط نسبة المبيعات على المتاجر الإلكترونية ويعمل استراتيجيات فعالة… عمومًا مستقبلاً هشرحلك الجزء اللى يخصنا احنا بنستخدمه أمته وازاى…

طيب ايه اشهر منصات CDP عندك يا سيدى منصة Segment وكمان Treasure Data وكمان BlueConic…. وعالعموم متخفش من الكلام وتحس انه صعب كله ده هشرحه فى بوستات مفصلة مستقبلاً وهعرفك ع الأجزاء اللي تخصنا احنا كـ SEO Manager وهى فى الحقيقة حوالى 25% بس من استخدامات منصات CDP….

عمومًا انا عارف البوست مش هيتفهم بسهولة لانى مريت بده قبل كده من سنين بس متقلقش كل جزئية قولتها هشرحها لوحدها فى بوست دسم…. وهوضحها بالتفصيل الممل انا عايزك بس دلوقت تفهم فكرة CDP وتعمل سيرش محترم عليه تمهيدًا لبعد كده… دمتم موفقين

التعليقات

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *